პირდაპირი უცხოური ინვესტიციები 2020 წელთან შედარებით გაიზარდა, 2019 წელთან შედარებით კი შემცირდა

წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2021 წლის მე-3 კვარტალში 299 მლნ. აშშ დოლარი შეადგინა, რაც 2020 წლის მე-3 კვარტალის დაზუსტებულ მონაცემებს 1.4 პროცენტით აღემატება. ხოლო პანდემიამდელ 2019 წლის ანალოგიურ მაჩვენებელთან შედარებით შემცირებულია. კერძოდ, 2019 წლის მე-3 კვარტალში ინვესტიციების მოცულობა 403.6 მლნ აშშ დოლარი იყო.

„საქსტატის“ ცნობით, 2020 წელთან შედარებით ინვესტიციების ზრდა ძირითადად განპირობებულია რეინვესტიციის მაჩვენებლის გაზრდით.

2021 წლის მე-3 კვარტალში საქართველოში განხორციელებული პირდაპირი უცხოური ინვესტიციების მიხედვით, უმსხვილესი ინვესტორი ქვეყნებიდან პირველ ადგილზეა გაერთიანებული სამეფო – 60.9 მლნ. აშშ დოლარით, რაც მთლიანი პირდაპირი უცხოური ინვესტიციების 20.4 პროცენტს შეადგენს, მეორე ადგილზე იმყოფება ნიდერლანდები – 59.8 მლნ. აშშ დოლარით (20 პროცენტი), ხოლო მესამეზე ჩეხეთი – 36 მლნ. აშშ დოლარით (12 პროცენტი).

2021 წლის საანგარიშო პერიოდში ყველაზე მეტი პირდაპირი უცხოური ინვესტიცია საფინანსო სექტორში განხორციელდა და 87.1 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 29.1 პროცენტია. მეორე ადგილზე იმყოფება ენერგეტიკის სექტორი – 69.3 მლნ. აშშ დოლარით (23.2 პროცენტი), ხოლო მესამეზე – დამამუშავებელი მრეწველობის სექტორი 54.8 მლნ. აშშ დოლარით (18.3 პროცენტი).